Renova thuajse me skuadër të re do të kërkojë mbetje në ligën e parë Klubi i futbollit Renova nga Xhepçishti ka bërë disa përforcime në prag të fillimit të përgatitjeve për sezonin e ri pranveror. Kjo skuadër e filloi fazën e parë të stërvitjeve më 11 janar, ku ishin prezentë edhe pesë përforcimet e reja, ndërsa kryesia e klubit paralajmëron prurje të reja. Në këtë sezon xhepçishtasit do të bëjnë çmos që edhe në vitin e ardhshëm të mbeten në ligën e parë të Maqedonisë. Pikërisht, për këtë shkak ishte patjetër që në këtë skuadër të sillen futbollistë të rinj, të cilët do të bënin ndryshim në skuadrën e Renovës dhe do të vazhdonin ritmin e rezultateve të mira në fund të sezonit vjeshtor. Përforcimi më i spikatur duket se është ai i Zharko Serafimovskit nga Vardari, i cili te Renova do të përforcojë mesfushën. "Kam ardhur në Renovë, pasi që trajneri i kësaj skuadre është edhe shoku im, i cili më ka treguar për organizimin e shkëlqyer në këtë skuadër. Unë u premtoj tifozëve të kësaj skuadre se do të jap maksimumin dhe se do të luftoj që skuadra të ketë sukses në luftën për të qëndruar në ligë"- tha futbollisti i ri i skuadrës, Zharko Serafimovski. Përveç futbollistit nga Vardari, radhëve të Renovës iu shtuan edhe futbollistë të tjerë siç janë Amir Aliu që erdhi nga skuadra e Dritës së Bogovinës, Goce Petrevski nga Makedonija Gj.P., Besart Isaku nga Karaormani dhe Ollgjaj Bajram nga Slloga Jugomagnati. Risi tjetër nga kjo skuadër është angazhimi i drejtorit të deritanishëm Qatip Osmani në postin e zëvendëstrajnerit të skuadrës së parë të Renovës. "Faza e parë e përgatitjeve do të zhvillohet në Tetovë, ndërsa faza e dytë në Dojranin e Vjetër ose në Negorci. Unë futbollistëve u dëshiroj punë të mbarë, shëndet dhe kërkoj nga ato përkushtim maksimal, me qëllim që Renova edhe në vitin e ardhshëm të luajë në ligën e parë"- u shpreh zëvendëstrajneri i ri, Qatip Osmani. Sipas kryetarit të klubit, Tahir Abullahu, Renova edhe me tej do të vazhdojë të punojë në angazhimin e emrave të rinj në skuadër. "Ne do të krijomë një skuadër fituese, me të cilën me siguri se do të arrijmë deri te qëllimi i nënvizuar, që të ngelemi në ligë. Nuk dua që të përmend emra, por mund të them se këto përforcime, bashkë me 4 kamerunasit, do të bëjnë ndryshim në skuadrën tonë"- deklaroi Tahir Abdullahu. Content of the new page